झापा-
मोरङको बेलबारीमा विद्यालय भवन निर्माणको काम गर्दै आएका भारतीय मजदुर बिहीबार बिहान मृत फेला परेका छन्। बेलबारी नगरपालिका-९ स्थित जनता माध्यमिक विद्यालयको भवन निर्माणमा खटाइएका भारतीय नागरिक ३५ वर्षीय रामानन्द विश्वास मृत फेला परेका हुन्।
मोरङ प्रहरी प्रमुख एसपी जनार्दन जीसीले सुतेकै ठाउँमा भारतीय मजदुरलाई मृत अवस्थामा भेटिएको जानकारी दिए। उनका अनुसार विद्यालयको भवन निर्माणको काम गर्दै आएका मजदुरहरु एकै ठाउँमा सुतेका रहेछन्। खाना खाएर राति अरु साथीहरुसँगै सुतेकामध्ये विश्वास ओछ्यानमै मृत फेला परेको जानकारी जीसीले दिए। उनको मृत्युको कारण खुलेको छैन। शव पोस्टमार्टमका लागि पठाएर घटनाका बारेमा अनुसन्धान थालिएको प्रहरीले जनाएको छ।
