झापा ।  झापाको बिर्तामोड नगरपालिका वडा नं. ७ मा रहेको सुन्दर निचाझोडा गोलधाप सामुदायिक वनले यो वर्ष १० लाख भन्दा बढि आम्दानी गर्न सफल भएको छ ।

वनले १० लाख ७० हजार ६ सय ७४ रुपैयाँ आम्दानी गरेको सोमबार सम्पन्न उपभोक्ता समूहको ९औँ वार्षिक साधारणसभामा प्रस्तुत प्रतिवेदनमा उल्लेख गरिएको हो ।

समुहका अध्यक्ष बद्री प्याकुरेलले प्रस्तुत गर्नुभएको प्रतिवेदनमा वनले कुल ३३ लाख ५४ हजार ५ सय २८ रुपैयाँ आम्दानी गर्दा २२ लाख ८३ हजार ८ सय ५४ रुपैयाँ खर्च भएको बताइएको छ ।

सामुदायिक वनलाई पर्यटकीय स्थलको रूपमा विकास गर्न विभिन्न संरचनाहरू निर्माण भइरहेको अध्यक्ष प्याकुरेलले बताउनुभयो ।

हालसम्म श्रमदानमार्फत वन संरक्षणका लागि घेराबार, सरसफाइ, पोखरी निर्माण, भुटानी शरणार्थी बसेका स्थानहरूमा रंगरोगन तथा संघीय सरकारको बजेटबाट हात्तीबाट जोगाउन फेन्सिङ तार जडान गरिएको उहाँको भनाइ थियो ।

कार्यक्रममा कोशी प्रदेशका खानेपानी, सिँचाइ तथा ऊर्जा मन्त्री एकराज कार्कीको प्रमुख अतिथ्यता रहेको थियो भने बिर्तामोड नगरपालिकाका नगर–उपप्रमुख नगेन्द्रप्रसाद संग्रौला, वडा नं. ७ का वडाअध्यक्ष अविरल कृष्ण खरेल, नेकपा एमाले बिर्तामोडका अध्यक्ष सुबास भट्टराई लगायतको उपस्थिति रहेको थियो ।